«Ezin dugu krisia gutxietsi, ezta finantza kontu hutsa denik esan. Horren atzean, argi dago porrot egin duela bai ongizatearen gizarteak, baita orain arteko garapen-ereduak ere. Azken hamabost urteotan, garapen ekonomiko handia egon den arren, eredu horrek ez du lortu desberdintasunak gutxitzerik, ez eta pobrezia murrizterik ere. Horregatik, beharrezkoa eta premiazkoa da, batetik, konturatzea aldaketa sakona egin behar dugula pertsonok eta komunitateok, eta bestetik, ondo aztertzea zer balio, motibazio eta estilo dugun bizitzako eremu guztietan» (FOESSA FUNDAZIOA, Espainiako Gizarte-bazterkeria eta Gizarte-garapenari buruzko VI. Txostena, 2008).

Lehengo ikasturtetik, Caritas kanpaina batean aritu da lanean; eta haren goiburua hau da: «Gizarteak balioak baditu, etorkizuna du». Kanpaina horren bidez, lau balio aurkezten dira: hala, gizarte eta komunitate-kristau hau ez den beste gizarte baterako aukera proposatzen da krisi-garai honetan. Izan ere, horrela, gizarteak etorkizuna izango du, eta gizatiarragoa eta integratzaileagoa izango da. Elkartasunari, parte-hartzeari, aniztasunari eta doakotasunari esker, litekeena da pertsonen eta taldeen jarrerek gehiago sustatzea batasuna, senidetasuna, harrera, solidaritatea, eta doakotasuna.

Karitate-garai honetarako Caritasek proposamen bat egiten du, baina proposamen hori ez dator bat gaur egun nagusitzen den merkataritza- eta kontsumo-gizartearekin. Erabili eta bota, edo zenbat duzun... horrenbeste balio duzu leloen kultura badago ere, beste jarrera batekin bizitzeko proposatzen dizugu guk. Gure ekintza jarrera horietan oinarritzen da: hain zuzen ere, doakotasunean eta konfiantzan.

Dohainik maitatu izan gaituzte (ik. 1 Jn 4, 10). Eman digutelako, ematen dugu. Eta dohainik eman digutenez, dohainik eman behar dugu (ik. Mt 10, 8). Dohainaren eta doakotasunaren garrantzia osagai garrantzitsuak dira gure erlijiozko bizipenean, eta zuzenean eragiten diote norberaren errealizazioari, eta besteekin ditugun harremanei.

«Gogoko ez baduzu merkataritza sozietate hau, izan zaitez eskuzabal»

• Atsegin ez dugun gizartearen irudiak atsekabez betetzen gaitu, eta beste zerbait bilatzera eramaten gaitu. Martxan jartzeko garaia da, dagoenarekin ez konformatzeko garaia. Doakotasunagatik laguntzeak zalantza eta harridura sortzen ditu gaur egungo munduan.

• Ez zaigu gustatzen gure gizartean ikusten duguna, min ematen digu egunero-egunero ikusteak zer sufrimendu, bazterkeria, marjinazio eta bidegabekeria eragiten dituen pobreziak. Azkenak daudenen aldeko konpromisoa dugu bizitzan; tinko sinesten dugu posible dela beste bizimodu bat, mundua denontzat eta denona dela, eta ez duela inork azkena izan behar, edo baztertuta egon behar. Izan ere, benetan sinesten dugu «Jende txiki asko, gauza txiki asko eta leku txiki askotan eginda, gai dela mundua aldatzeko».

Corpus. Karitate Eguna, 2010eko ekainaren 6a

Donostiako Elizbarrutiko Caritas